കൊവിഡ് ബാധിച്ച് ഗുരുതരാവസ്ഥയിലായിരുന്ന നടി ബീന ആന്റണി രണ്ട് ദിവസങ്ങള്ക്ക് മുമ്പാണ് ആശുപത്രി വിട്ടത്. കോവിഡ് ബാധിച്ചതിന് പിന്നാലെ ന്യൂമോണിയ ബാധിച്ചതാണ് താരത്തിന്റെ അവസ്ഥ മോശമാക്കിയത്. ഇപ്പോഴിതാ കൊവിഡ് ബാധിച്ച സമയത്തെ തന്റെ അനുഭവം പങ്കുവയക്കുകയാണ് താരം.
മരണത്തെ താന് മുഖാമുഖം കണ്ടെന്നാണ് ബീന ആന്റണി പറയുന്നത്. അമ്മ സംഘടനയുടെ സഹായം ലഭിച്ചതിനാല് ആശുപത്രി ചിലവുകള് കുറഞ്ഞ് കിട്ടി. അമ്മയുടെ സഹായം വളരെ വലുതായിരുന്നുവെന്നും ബീന ആന്റണി വ്യക്തമാക്കി. യൂട്യൂബ് ചാനലില് വീഡിയോയിലൂടെയാണ് താരം തന്റെ രോഗം സ്ഥിരീകരിച്ചതിന് പിന്നാലെയുള്ള തന്റെ അവസ്ഥ പറഞ്ഞത്. രോഗം ഭേദമായെങ്കിലും ബീന ഇപ്പോള് വീട്ടില് നിരീക്ഷണത്തിലാണ്.
ബീനാ ആന്റണിയുടെ വാക്കുകള്
‘എല്ലാവരോടും ഒരുപാട് ഒരുപാട് നന്ദി. ശരിക്കും പറഞ്ഞാല് വല്ലാത്ത അവസ്ഥയിലൂടെയാണ് കടന്നുപോയത്. ശ്വാസമൊക്കെ നന്നായി എടുക്കാന് സാധിക്കുന്നുണ്ട്. ഇതൊന്നും ഞാന് പ്രതീക്ഷിച്ചിരുന്നില്ല. ഇതുവരെ പറഞ്ഞു കേട്ട അറിവുകളേയുണ്ടായിരുന്നുള്ളൂ. ഇത്തരമൊരു അവസ്ഥയിലൂടെ കടന്നുപോയിട്ടില്ല. പുതിയൊരു ഷൂട്ടുമായി ബന്ധപ്പെട്ട് എറണാകുളത്ത് ജോലി ചെയ്യുമ്പോഴാണ് കൊവിഡ് ബാധിക്കുന്നത്.
തളര്ച്ച തോന്നിയപ്പോള് തന്നെ കാര്യം മനസ്സിലായി. വീട്ടിലിരുന്ന് റെസ്റ്റ് എടുക്കാന് തീരുമാനിച്ചു. അങ്ങനെ വീട്ടില് ആറേഴ് ദിവസം ഇരുന്നു. പക്ഷേ പനി വിട്ടുമാറുന്നുണ്ടായിരുന്നില്ല. എന്നാലും ആശുപത്രിയിലേക്ക് പോകേണ്ട എന്ന് തോന്നി. അത് ഏറ്റവും വലിയ തെറ്റായിപ്പോയി. പനി വിട്ടുമാറുന്നില്ലെങ്കില് ആശുപത്രിയില് പോകണമെന്ന് ബന്ധുക്കളും നിര്ബന്ധിച്ചു. ഡോക്ടറുമായി സംസാരിച്ച് അഡ്മിഷന് റെഡിയാക്കിയിട്ടും പോകാന് മടിച്ചു.
പള്സ് ഓക്സിമീറ്റര് ഉപയോഗിക്കുമായിരുന്നു. അതിലെ റീഡിങ് 90ല് താഴെയായപ്പോള്, ശ്വാസം കിട്ടാത്ത അവസ്ഥയിലായി. ഒരു സ്റ്റെപ്പ് വച്ചാല് പോലും തളര്ന്നു പോകുന്ന അവസ്ഥ. അതിനുശേഷമാണ് ഇഎംസി ആശുപത്രിയില് പ്രവേശിച്ചത്. ഡോക്ടര്മാരും നഴ്സുമാരും നല്ല കെയര് തന്നു.അതുകൊണ്ട് പെട്ടെന്ന് രോഗമുക്തി നേടാന് പറ്റി.
ആശുപത്രിയിലെത്തിയ ആദ്യം ദിവസം തന്നെ മരണത്തെ മുഖാമുഖം കണ്ടു. ശ്വാസം കിട്ടാത്ത അവസ്ഥ വന്നു. രണ്ടുദിവസം ഓക്സിജന് മാസ്ക് ധരിച്ചായിരുന്നു മുന്നോട്ടുപോയത്. ഇതിനിടെ ന്യുമോണിയ വല്ലാതെ ബാധിച്ചിട്ടുണ്ടായിരുന്നു. പക്ഷെ ഇക്കാര്യം ആരും എന്നെ അറിയിച്ചിരുന്നില്ല.
രണ്ട് ദിവസം കൊണ്ട് ആരോഗ്യനില മെച്ചപ്പെട്ടത് ഡോക്ടര്ക്ക് പോലും ഭയങ്കര അതിശയമായി. രണ്ട് ദിവസം കൊണ്ട് ഓക്സിജന് മാസ്ക് മാറ്റാന് കഴിഞ്ഞത് വിശ്വസിക്കാന് കഴിയുന്നില്ലെന്നും ഡോക്ടര് പറഞ്ഞു. ആശുപത്രിയിലെ സുരക്ഷാ ജീവനക്കാര് മുതല് എല്ലാവരോടും നന്ദി പറയുന്നുവെന്നും താരം വീഡിയോയില് പറഞ്ഞു.
ഇപ്പോള് ഒരാഴ്ച ഹോം ക്വാറന്റീനിലാണ്. അതുകഴിഞ്ഞ് എല്ലാവരുമായി ഒന്നിച്ച് നിങ്ങളെ കാണാന് വരും. ദൈവം ഒപ്പമുണ്ടായിരുന്നു. എല്ലാവരോടും കടപ്പെട്ടിരിക്കുന്നു. ലോകത്തിന് മുഴുവന് നന്മ വരട്ടെ. കൊവിഡ് ലോകത്ത് നിന്നുതന്നെ മാറി പോകാന് ഈശ്വരന് അനുഗ്രഹിക്കട്ടെ. നന്ദി.’- ബീനാ ആന്റണി പറഞ്ഞു.
Discussion about this post